Камп на иновации во соработка со Општина Гази Баба, 29 април 2026

Posted on: 04.05.2026

Џуниор Ачивмент Македонија на 29 април 2026 година, со финансиска поддршка од Општина Гази Баба и во соработка со Факултетот за земјоделски науки и храна при УКИМ – Скопје, успешно организираше Камп на иновации – натпревар во претприемнички вештини наменет за средношколци. На настанот учествуваа околу 40 ученици од средните училишта во Општина Гази Баба: СУГС „Панче Арсовски“, СЕТУГС „Михајло Пупин“ и АСУЦ „Боро Петрушевски“.

Преку динамична и интерактивна работа, учениците работеа на развој на бизнис идеи насочени кон подигнување на свеста за правилна набавка, употреба и управување со храната, со цел намалување на отпадот и заштита на животната средина. Учесниците беа поделени во мешани тимови, што овозможи размена на идеи, знаења и искуства помеѓу учениците од различни училишта.

Кампот на иновации претставуваше инспиративен и едукативен настан каде младите имаа можност да ги унапредат своите претприемнички вештини, да научат како ефективно да соработуваат во тим, да креираат иновативни решенија и да ги претворат своите идеи во конкретни и одржливи концепти со позитивно влијание врз заедницата.

Учениците изразија огромно задоволство од учеството на Кампот на иновации, истакнувајќи дека ваквите настани им овозможуваат да стекнат нови знаења, да развиваат креативни идеи и да соработуваат со врсници од различни училишта. Тие посочија дека им се потребни повеќе вакви практични и инспиративни настани, кои ги мотивираат да размислуваат претприемнички, да бидат активни и да придонесуваат кон позитивни промени во заедницата.

Настанот уште еднаш ја потврди важноста на соработката помеѓу образовните институции, локалната самоуправа и граѓанскиот сектор во создавање можности за младите. Овој Камп на иновации претставува одличен пример за заедничко вложување во знаењето, креативноста и иднината на младите генерации, во рамки на Договорот за учество во финансирање на проекти на здруженија на граѓани и фондации од локален интерес за 2026 година со Општина Гази Баба.